Дүрслэх урлагийн музейд "AR" технологи нэвтэрч эхэллээ Cga.mn | Контент, урлаг, мэдээ мэдээллийн нэгдсэн сайт

Дүрслэх урлагийн музейд "AR" технологи нэвтэрч эхэллээ

Монголын Урлагийн Зөвлөл /МУЗ/ нь соёлын өвийн хадгалалт хамгаалалтын чиглэлээр үйл ажиллагаа явуулдаг байгууллагуудын шинэ соргог бүтээлч санаачилгыг дэмжих үүднээс үндэсний өв соёлын өвийг хадгалж хамгаалах, түгээн дэлгэрүүлэх зорилго бүхий төслийн тэтгэлгийн уралдааныг 2020 оны 1 сард зарлаж.

Энэ уралдаанд 30 байгууллага 35 төслийн санал ирүүлснээс Г.Занабазарын нэрэмжит Дүрслэх урлагийн музейн үзмэрийг цахим агуулгаар баяжуулах “Augmented Reality ухаалаг хөтөч” төсөл МУЗ-ийн Хөтөлбөрийн хорооны гишүүдийн саналаар тэргүүлж, М-Си-Эс Группийн санхүүжилтээр хэрэгжүүлж буй “Өв Эрдэнэ” тэтгэлэгт хөтөлбөрөөс 30 сая төгрөгийн санхүүжилтийг хүлээн авсан юм.
Энэхүү төсөл нь музейн үйл ажиллагаанд технологийн дэвшлийг нэвтрүүлэх, хүүхэд залууст соёлын өвийн болон урлагийн боловсрол олгох зорилготой бөгөөд үзэгчдийн оролцоог хангасан интерактив үзүүллэгийг бий болгож, олон нийт тэр дундаа залуу хойч үеийн сонирхлыг соёлын өвд хандуулах, урлагийн бүтээлээр дамжуулан тэдэнд гоо зүйн хүмүүжил олгох, музей үзэгчдийн тоог нэмэгдүүлэх ач холбогдолтой юм.
Төслийн хүрээнд бурхны шашны урлаг, зээгт наамал, уран зураг, баримал, уран дархан, сийлбэр, ардын гар урлал зэрэг Монголын дүрслэх урлагийн сор бүтээлүүд, археологийн малтлагаас илэрсэн түүх соёлын дурсгалын тайлбарыг цахим агуулгаар баяжуулан 10-р сараас эхлэн Augmented Reality буюу AR ухаалаг нүдний шилний тусламжтайгаар музейн үзэгчдэд хүргэж байна.
Augmented reality хөтөч нь бодит үзмэрийг нэмэлтээр график, видео, судалгааны гэрэл зургууд, текст, аудио мэдээллээр баяжуулсан ба ингэснээр музейн боловсролын ажлыг шинэ түвшинд авчрах, цаашлаад өнөөгийн монголын музейн салбарт нэгэн шинэ инновацыг нэвтрүүлж байна. Уг төслийн хүрээнд мөн музейн онцлох үзмэрүүдийн тайлбарыг цахим агуулгаар баяжуулсан ухаалаг утасны AR аппликейшн цаашид хийгдэх юм.
Дүрслэх урлагийн музейд жилд дунджаар 11000 гаруй үзэгчид ирдэг бөгөөд тэдгээрээс ойролцоогоор 50 гаруй хувийг хүүхэд, залуучууд эзэлдэг.
Хүүхэд залуучуудын хувьд сургууль, гэр бүлийн шаардлагаар музейд ирэх бус тэдгээрийн сонирхлыг илт татахуйц дэвшилтэт технологиор дамжуулан эх орныхоо түүх, соёлыг улам их танин мэдэх хүсэл, сонирхлыг өдөөж, цаашлаад соёлын өвөө дээдлэн хүндэтгэх, соёл урлагийн салбарын хөгжлийг шинэ түвшинд гаргах, сэргээж болохыг ойлгуулах, өөрсдийн ирээдүйд хувь нэмрээ оруулах хүсэл сонирхол, ухамсрыг төлөвшүүлэхэд чиглэн уг төсөл хэрэгжиж эхэллээ.





<< Өмнөх мэдээ Дараах мэдээ >>
Танд санал болгож буй мэдээллүүд

0 Сэтгэгдэл

Сэтгэгдэл бичих